Kereban nitihka tema dalam Dokumen Standard  Jaku Iban Tikas Primari 2

Kereja Latih Sintaksis

1.   Rintaika rambai jaku ti bisi dalam Jaku Iban.
2. Bepelasarka saut nuan ba tanya lumur 1, beri chunto ayat ti bisi ngundan rambai jaku nya.
3. Terangka ngena kar grafik pasuk frasa jaku penempat.
4. Tengkebang ayat tanya tebuka enggau ayat tanya betutup.

Kereja Latih morfologi

1.  Padahka reti jaku betandu.
2.  Sebut ngena jaku diri empu penemu nuan senentang jaku ganti nama diri orang.
3.  Beri bida senentang jaku pengawa transitif enggau jaku pengawa ukaii transitif.
4. Gaga siti ayat ti ngundan jaku adjektif tunggal.

Kereja Latih Fonetik enggau Fonologi

1. Terangka reti fonetik artikulasyen.
2. Beri simpul penemu nuan senentang fonetik akustik.
3.  Pandangka chara letup kelekanit kering gusi-bemunyi (j) nitihka penemu nuan empu.
4. Beri pemutus penemu nuan senentang munyi diftong dalam Jaku Iban.

Kereja Latih Semantik

1. Padahka sempama ke bisi bekaul enggau fungsyen sempama.
2. Beri penerang ti silik senentang ambiguiti.
3. Bepelasarka saut nuan senentang tanya ba saut tanya lumur 2 nya, beri chunto ti engkeman.
4. Terangka konsep semantik nitihka Ferdinand de Saussure lalu beri disempulangka enggau chunto ti seriran. 

Nya aja, terima kasih. 

Link ngagai laman web Suruhanjaya Perkhidmatan Awam Malaysia. :)

http://www.spa.gov.my/Portal/

Sintaksis Jaku Iban

Konsep, sakum konstituen enggau atur ngaga ayat pasif jaku Iban.

Nitihka Ahmad Khair Mohd Nor (2003) madahka ayat pasif nya ayat ti nyadi ari ayat aktif transitif. Tusun ayat pasif ngembuan tusun leka jaku ti bebida ari tusun leka jaku dalam ayat aktif. Chunto iya, “ Tanchut pandak aku dikena iya.” Ti dibali ari ayat aktif transitif “Iya ngena tanchut pandak aku”.  Ayat pasif sebansa ari ayat ti mandangka pengawa ti ngeluanka objek lalu dikemudika orang ti ngereja pengawa nya (Asmah Haji Omar, 2008). Ba jaku Iban ayat pasif tau dibagi ngagai ayat pasif ti mai penambah pengawa pasif enggau ayat pasif ti mai jaku ganti nama diri kesatu enggau jaku ganti nama diri kedua. Nya alai, dalam ayat pasif bisi jaku pengawa pasif iya nya jaku pengawa nyadi subjek ti nyadika penerang ba ayat pasif.

Ayat pasif asal iya datai ari ayat aktif transitif lalu struktur iya baka tu Subjek + (Jaku Pengawa Transitif) JPT+ Objek (Ahmad Khair Mohd Nor, 2009). Chunto ayat, Junan makai buah rian nya. Ari chunto ayat nya tadi Junan iya nya subjek, JPT ayat iya nya makai lalu objek iya buah rian nya. Tusun tu dikumbai kitai tusun selama tauka tusun aktif. Tang, tusun tu ulih diubah ngagai struktur pasif nyadi bakatu “Buah rian nya dipakai Junan.”  Ba jaku Iban ayat pasif ti mai penambah jaku pengawa pasif mina siti aja iya nya penambah di-.

Chunto iya, “Wat Jeli digagai ukui lemai kemari.” tauka “ Bup nya udah dibacha iya ambis pagi tadi.” Dalam jaku Iban ayat pasif ti ngena jaku pengawa pasif di- enda sebaka atur ba jaku Melayu laban pasuk ulih +FN udah jaku pengawa enda dikena ba jaku Iban (Chemaline enggau Padang, 2011). Ayat pasif jaku Iban tau mega digaga enggau jaku pengawa ti ngundan penambah ber- .  Ambika chunto, “Sida Amy berami besai semalam-malam tu tadi.” tauka “ Suda berambis duit nyengula ke anak iya ba universiti.”

Diatu kitai belinsur meda ayat aktif kedua iya nya ayat pasif enggau jaku ganti nama diri kesatu enggau kedua. Ba pasuk ayat pasif ti betukuh baka tu, jaku ganti nama diri diengkahka ari belakang jaku pengawa pelasar. Jaku ganti nama diri orang kesatu enggau kedua ulih nerima jaku pengawa ti bepenambah di-. Jaku ganti nama diri orang kesatu enggau kedua ti datai ari belakang jaku pengawa pelasar nya enda tau enda betukuh penuh. Jaku ganti nama diri penuh ke tau dikena nya baka aku, nuan, sida enggau kami. Chunto ayat, “ Lauk nya apin disumai aku.” Asi nya nyadika subjek lalu apin disumai aku  nya nyadi jaku frasa pengawa pasif lalu ditangkanka enggau ganti nama diri kesatu tauka kedua. Enti kitai meda tukuh ayat ba ayat aktif ayat iya baka tu “ Aku apin nyumai lauk nya.” Nyadi formula iya enti udah dipasifka nyadi baka tu, Subjek + Frasa Pengawa Pasif enggau Ganti Nama Diri (GND) Kesatu tauka Kedua.

Sebaka enggi Melayu jaku Iban mega bisi ngembuan ayat pasif tunsang . Chunto iya, “ Ai nya irup aku.” Ti datai ari ayat pasif ngena tusun selama iya nya “ Diirup aku ai nya.” Suah bendar kitai Iban saru penemu ngumbai ayat “Ai nya irup aku.”, ayat aktif sama enggau ayat “Aku ngirup ai nya.”.Penyaru tu ulih diseliahka ngena chara nentuka bida intonasyen dua bengkah ayat nya. Ayat aktif ngena pola intonasyen 2-4-2-3, tang pola intonasyen ayat pasif tunsang nya 2-3-1 baka ti dipeda ba chunto ba baruh tu:         

Ukai nya aja, jaku Iban mega bisi bekena ke ayat pasif enggau jaku bantu pasif kena ba ayat. Ayat pasif bakatu mai leka jaku kena ba mua jaku pengawa pelasar ti nadai nerima penambah mua. Pasuk leka jaku “ulih” tauka “oleh” ti bisi dalam jaku Melayu taja pen bisi dikena tang suah diilih ketegal iya enda senutuk enggau atur dalam jaku Iban. Nya alai kitai anang saru senentang atur tu laban dalam jaku Iban endang nyemetak bendar madah ngagai kitai nadai ngena jaku “ulih” lebuh nempa ayat pasif baka jaku enggi Melayu. Chunto iya tau dipeda ba ayat tu, “ Amy kena tipu kaban iya”.

Penerang iya bakatu, “Amy” nya subjek lalu ditangkan enggau leka jaku “kena”. Reti leka jaku “kena” ditu nyadi jaku kerja ti mai reti dikereja orang (baikka orang nya sengaja tauka enda sengaja)(Bup Sereba Reti Jaku Iban, 2011). Chunto iya tau dipeda ba ayat diatas nya tadi “kena tipu”. Leka jaku “tipu” nya jaku pengawa pelasar lalu disambut objek ari pasuk Frasa Nama baka kaban iya. Ambika nyamai diperetika kitai atur lebuh kitai ngena jaku bantu pasif “kena” tu bakatu, Subjek + Kena + Jaku Pengawa Pelasar + Frasa Nama.           

a 

Semantik Jaku Iban

3.0 Teori Segitiga Semiotik (Ogden & Richard, 1923)

3.1 Konsep Teori Segitiga Semiotik

                                                             

                                      Simbol                                                 Referens

Nithka Ogden enggau Richard (1923) dalam bup The Meaning of Meaning, reti dipeda ba tiga komponen, iya nya lambang tauka simbol, pikir enggau pekara. Ketiga - tiga pekara nya bekaul rat enggau pangan diri. Reti diterangka bepelasarka tiga komponen ti dipechahka bakatu simbol iya nya leka jaku, pikir iya nya konsep ngagai gambar lalu referens iya nya pekara tauka penemu. Kaul entara simbol enggau konsep tauka pikir sereta konsep enggau referens iya nya kaul ti menyana, lalu konsep nya mih ke bekaulka simbol enggau referens.

Konsep tauka runding ngembuan kaul sechara langsung enggau kedua- dua elemen kebukai iya nya tanda. Sanding penemu ngembuan kaul enda langsung iya nya antara kaul jaku enggau kaul entara dunya nyata (Palmer, 1981: 24). Nya alai, kaul entara tanda enggau sanding penemu dikelai ngena garis putus.

Lalu nitihka Raminah Hj. Sabran enggau Rahim Syam (1987), simbol iya nya konstituen linguistik baka leka jaku tauka ayat, referens iya nya pekara lalu pikir iya nya konsep. Bepelasarka teori tu, siti leksikal nya udah dibagi ngagai tiga elemen ke bekaul enggau elemen kebukai iya nya tanda tauka simbol, referens enggau konsep. Tanda tauka simbol iya nya kaul ti ayan entara tukuh kelai enggau referens ke betukuh abitrari enggau konvensional.

Jurnal Bahasa (2009), tanda tauka simbol iya nya tikas kaul ti ayan entara tukuh kelai enggau referens ke betukuh abitrari enggau konvensional. Tanda tauka simbol mega berubah ari sehari ke sehari nitihka peneka siti- siti komuniti. Kemusian, konsep iya nya runding siku- siku orang senentang tukuh ti bisi ba utai ti dikejakuka.

3.2 Teori Segitiga Semiotik enggau chunto

                                                                    Konsep

ü  Ngembuan iku ti panjai.

ü  Ngembuan ngeli ti tacham sereta mayuh.

ü  jari enggau kakiBisi

                                      Simbol                                                Referens

                                    B, A, Y, A                                          (Gambar Baya)

Chunto, konsep bagi baya iya nya ngembuan ngembuan iku ti panjai, ngembuan ngeli ti tajam sereta mayuh, bisi jari enggau kaki enggau ti bukai. Simbol ngagai baya nya dikelai ngena urup b, a, y, a iya nya sepil ngagai baya. Referens iya nya gambar ke bisi dalam dunya nyata lalu bisi mega dalam runding siku- siku mensia.

Morfologi Jaku Iban

1.    0 Definisyen Morfologi

Morfologi sesebengkah bansa jaku nya jalai nempa leka  jaku. Bisi sekeda bansa jaku di dunya tu sebaka jalai nempa leka jaku lalu bisi mega bebida. Bisi sekeda jaku ngena chara meri penambah ngagai urat jaku lalu bisi mega ngena chara ngubah tukuh dalam leka jaku nya empu baka jaku Arab. Nyadi morfologi jaku Iban nya bidang penemu ti betungkapka struktur, tukuh enggau raban jaku, iya endang siti bidang ti kompleks lalu tau dipeda nyadi jematan ti besabungka kaul sintaksis enggau fonolgi jaku. Morfologi dikumbai bekaul enggau pansik munyi sebut jaku laban iya ngemeranka pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku iya tau didijir nyadi frasa, klausa enggau ayat ti mai reti. Nya alai dalam bab tu kitai deka beratika pansik jalai jaku berengkah ari konstituen ti pengabis mit dalam atur jalai jaku ti tau dikena nempa leka jaku sereta bisi mai reti ti meruan sereta menyana.

Baka ti udah disebut pansik struktur jaku mungkur munyi sebut tauka lambang tulis ti nyadii unit jaku ti bisi ngundan reti. Tukuh jaku nya gaya unit jalai jaku, sekalika iya betukuh tunggal tauka datai ari proses meri penambah, beturuka leka jaku tauka proses jaku betandu. Beripihka jaku ngagai raban jaku nya proses nijirka leka jaku ngagai raban ti bisi leman penyemaka lalu tau dibagi nitihka fungsi dalam raban leka jaku ti sama. Unit jalai jaku ti nyadi leman leka jaku disebut morfem. Morfem nya unit ti pengabis mit dalam jaku ti befungsi gramatis dalam jalai jaku. Leka jaku nya tukuh jaku ti mit tang ngundan reti ti menyana lalu ulh bediri kediri.

Morfologi jaku Iban patut ditarak enggau menuku laban tu beguna bendar dikena ngayanka guna tiap- tiap konstituen jaku ngambika ulih dikena semua orang enggau menuku. Disebut enggau rentang morfologi jaku Iban nya endang beguna bendar laban bansa Iban seruran ngaga tauka mansutka leka jaku baru lebuh sida berkomunikasyen. Jaku nambah – senambah nitihka tuju enggau guna mensia ti ngena iya enggau chukup luas. Jaku pansut sereta tumbuh nadai besekat ari orang ti nyebut iya nya alai lebuh belajarka jaku kitai patut ngelala konstituen sereta leman jaku ti bediri nyadi jaku nama, jaku pengawa, jaku adjektif, jaku tugas enggau utas jalai jaku ti bukai mega.

2.0 Tukuh Leka Jaku Iban

Dalam jaku Iban mayuh chara nempa leka jaku. Leka jaku bisi nya betukuh tunggal, chunto rumah, manah, enggau tegap. Pia mega, bisi leka jaku ti ditempa ari proses meri penambah, beturuka leka jaku enggau betanduka leka jaku. Chunto leka jaku ti ditempa ari proses meri penambah nya nyebut, berubat enggau belajar. Chunto leka jaku ti ditempa ari proses beturuka leka jaku nya baka mirah chechinang enggau rumah panjai; lalu leka jaku ti ditempa ari proses betanduka leka jaku manah-  manah enggau beguai- guai.

Munyi ti udah disebut, Jaku Iban nya siti ari bansa jaku dalam raban jaku aglutinatif tauka jaku ti betukuh derivatif. Jaku ti bansa tu ulih nempa leka jaku ketebal agi ari proses ngelekatka penambah tauka besakumka morfem urat jaku enggau morfem penambah ngena chara bedijirka leka jaku dalam siti baris. Reti nya penambah disakum enggau urat jaku. Penambah nya tau dikelala baka penambah mua, penambah belakang, penambah selit enggau penambah kepit. Urat jaku sambung ambika chunto, ulih nerima penambah mua, iya nya besambung (be + sambung), penambah belakang iya nya, sambungka (sambungka + ka), penambah kepit iya nya besambungka (be + sambung + ka), ti disebut tukuh leka jaku bepenambah.

Proses nempa leka jaku ti betukuh derivatif tu ulih ngasaika mayuh amat leka jaku ari proses besakum tauka besambungka leka jaku enggau mayuh macham penambah ti bisi. Taja pia, atur ti bansa tu enda ulih dikena enggau sepeneka laban iya mesti bepegai ba prinsip ti dipesetuju lalu dikena dalam komuniti Iban empu. Kelimpah ari ti nitihka singkang pemansang jaku bukai baka jaku Melayu enggau jaku English dalam konteks menua Malaysia.

Dalam jaku Iban, ambika chunto, siti ari urat jaku peda, iya ulih dikerembaika ngagai leka jaku baru baka tu; dipeda, meda, meda- meda, bepeda, bepedaka, bepeda- pedaka, tepeda, tepedaka semeda, sepemeda, daya peda enggau pengulih peda. Langkah rapat dikena ngerembaika jaku dalam jaku Ibanendang besibil enggau jaku bukai kelebih agi jaku ti betukuh infleksyen baka jaku English enggau jaku Arab enggau mayuh jaku ti bukai.

Kelimpah ari proses nempa leka jaku ti udah disebut, leka jaku ulih mega ditempa ari ti betanduka urat leka jaku enggau penuh. Chunto, taing- taing, seput- seput, enggau puas- puas. Pia mega, bsi proses betanduka sebagi ari patah sebut urat jaku baka bebelit- belit enggau ngulai- sengulai. Betanduka patah sebut dudi nya siti mega proses nempa leka jaku baka pemerani- rani enggau pengetan- ngetan enggau mayuh chunto kebukai.

Siti agi chara nempa leka jakunya ari ti beturuka leka jaku, iya nya besambungka dua leka urat jaku tauka lebih nyadi siti leka jaku baru, chunto, jalai alun, peputan gali, tusu tepung, enggau mayuh ti bukai. Nambahka nya rapat salin ari jaku injautau mega dikena baka leka jaku, telefon binching, bandar raya, bulan madu, enggau mayuh leka jaku baru ti datai ari proses evolusyen jaku. Ngena chara ngedut leka jaku lalu ngasilka leka jaku tunggal akronim, tau mega dikena baka ba leka jaku, Mara (Majlis Amanah Rakyat), palanem (palan latih nembiak), temarin (tempat memarin) enggau ti bukai. Tiap- tiap proses tu deka dipetungkapka enggau dalam agi nangka tu.

2.    1 Leka jaku tunggal

Semua leka jaku dalam jaku Iban ti nadai nerima penambah tauka nadai nengah proses beturu tauka betanduka leka jaku diserangkungka dalam jaku tunggal. Bisi dua bengkah jaku tunggal dalam jaku Iban iya nya jaku tunggal ti ngundan siti patah sebut enggau jaku tunggal ti ngundan dua patah sebut tauka lebih. Tajapan ketebal agi jaku tunggal nadai nerima penambah baka: tu, nyin, nya, ditu enggau din tang bisi sekeda jaku tunggal dalam jaku Iban bisi pengering ulih bekenjing lalu ngerembai nyadi jaku tumbuh.

Enti diperatika ari segi patah sebut, leka jaku tau ngundan siti patah sebut tauka lebih ari siti patah sebut. Patah sebut tau datai ari siti vokal (V) aja, siti vokal begulai enggau siti konsonan (K), tauka siti vokal bekaling enggau beberapa iti konsonan. Konsonan ari mua enggau belakang. Lalu pia mega konsonan tau datai beraban (KK).

2. 1. 1  Jaku tunggal siti patah sebut

Penyampau jaku tunggal asal ti ngundan siti patah sebut ba jaku Iban enda mayuh. Sekeda leka jaku tunggal nya datai ari jaku injau baka jaku Melayu, English enggau jaku bansa bukai. Peratika pola sakum konsonan- vokal dalam jaku tunggal di baruh tu.

Jaku tunggal siti patah sebut	Chunto
VV	Au        (saut kena madahka setuju) Ai         (ai ujan, ai sungai etb)
KV	Yu        (sebansa ikan tasik) Tu        (madahka endur ke semak orang ti bejaku) Ju        (sakal tauka tulak) Ru       (sebansa kayu) Ti         (jaku relatif)
VK	It          (ngansak ukui nyalak ari endur ti jauh) As        (ngansak ukui nyalak ari endur ti semak)
KVK	Suh      (beri/ ngagai) Roh     (semengat) Bah      (ai besai udah ujan/bebai) Bab      (lumpar tauka bagi dalam bup)
KKVK	Stor     (bilik alai nyimpan barang) Skel     (tangga/tingkat/sukat) Draf     (langgut)
KVKK	Teks    (bup/nota)
KKKV	Skru
KKKVK	Skrip, straw

2. 1. 2 Jaku tunggal dua patah sebut

Leka jaku dalam jaku Iban tebal agi datai ari leka jaku dua patah sebut. Sekeda pola jaku tunggal dua patah sebut nya baka ba chunto di baruh tu.

Jaku tunggal dua patah sebut	Chunto
V + KV	A          -           ku        aku      (ganti nama diri) A          -           lu         alu       (kereban dikena nutuk)
V + VK	Aus      aur       ais        auh      aum
KV + V	S          -           ua        sua      (beri/enjuk) D         -           ua        dua      (penyampau) T          -           ua        tua       (nuan enggau aku)
V + KVK	Emas      ubat    ikan      ubah         ulat iris           akih     ujut      utan            ilut
V + KV	Aku      ubi       isu        ila         ela adi       iri         ipa       aka      aji
VK + KVK	Umpan            u     ntak          empat              ambun       umbak undur         indik          unduh              ampuh       ampun
KV + VK	Paut     kait      pait      baum   baur     buan daun    gaul     giut      jauh
KV + KV	Jala     pasu    buku    garu     buka    rata leka     kita      bisu      kera
KV + KVK	Kapal   pukul   bakul   jarum   mulut   kilum   dugal
KVK + KV	Lampu           sunti                   sendi                danji Tanju             dunju                gambi              panti
KVK + KVK	Bintang            sandar tanduk tampas            sampal            nimbal
KV + VV	Buai     tuai      diau     biau

2. 1. 3 Jaku tunggal tiga patah sebut

Leka jaku tunggal tiga patah sebut enti dibandingka enggau leka jaku tunggal dua patah sebut endang mayuh agi. Pola tusun konsonan- vokal leka jaku ti bansa tu nabur mayuh agi. Enti diperatika leka jaku ti ngundan tiga patah sebut sekeda nya jaku injau ari jaku bansa bukai. Sekeda pola patah sebut leka jaku tiga patah sebut leka jaku tiga patah sebut nya baka ba rintai di baruh tu.

Jaku tunggal tiga patah sebut	Chunto
KV + KKV + KV	Pechaya    bechura    pechara   kenyadi
KV + KV + KVK	Seriran        Begerit      Begerut    Merusut     Beburah Bedemuh    Lelegup     Peluluh
V + KV + V	Idea       Urea        Anoa
KV + KV + V	Semua     Mulia        Petua       Deria      Menua      Pemai Bejai        Terai
KV + KV + KV	Lelaki       Lelabi       Leluba      Teruna   Sebana   Bebini Belaki       Terima
KV + KV + VK	Meruan    Keruan     Seruan     Beduan   Beruit   Meruik Beduit      Meruik      Ngerait
KVK + KV + V	Mentua    Tempua    Pendua    Kenduai
KVK + KV + VK	Tempias    Bankuet      Lengkuas    Borjuais    Jengkuan Sengkuar
V + KV + KV	Utara    Ugama    Aroma    Opera
V + KV + KVK	Amanah     Amatur
VK + KV + KV	Antara     Istana       Asrama     Indera
KVK + KV + KV	Menteri    Soldadu     Mentega      Bestari
V + KV + VK	Akaun    Elaun     Ideal
KV + KV + KVK	Belelang     Senapang    Binatang   Selaput    Kelapis Keretas       Keretum      Penapat
KVK + KV + KVK	Sembilan    Tempayan    Maksimum     Lengkiang
KV + KVK + KV	Belanja    Perengka      Terumbu    Perambu    Teranau
KVK + KVK + KV	Semperna
KV + KVK + KVK	Belimbing     Gelanggang    Belangkas    Kemundang Gelumbang   Pelantar         Selambar       Selimban
KV + KKV + VK	renyuan
KV + KKV + KVK	penyawan   pendawan   sengkawan

2. 1. 4 Jaku tunggal empat patah sebut

Jaku tunggal ti bansa tu penyampau iya kurang agi ari jaku tunggal tiga patah sebut baka ti udah disebut di atas nya tadi. Sekeda leka jaku tu datai ari jaku injau. Peratika pola jaku nya di baruh tu.

Jaku tunggal empat patah sebut	Chunto
KVK + KV + KV + KVK	Sentimeter
V + KV + KVK + KV + KV	Universiti
VK + KKV + KV + KV	Emperaja
VK + KKV + KVK + KVK	Encherindak
VK + KV + KV + VK	Engkalait
KVK + KV + KV + KV + KVK	Kosmopolitan
KV + KV + KV + KVK	Kapitalis     Bekedengung
KV + KV + KV + KVV	Bekedugau     Bekedayau
KV + KV + KVK + KKV	Begerancha
KVK + KVK + KV + KV	Dispensari
KV + KV + V + KVK	Nasional

Semua chunto leka jaku di atas nya endang leka jaku tunggal dalam leka jaku Iban. Kelimpah ari leka jaku di atas jaku akronim mega masuk dalam raban jaku tunggal. Akronim nya jaku kedut ti dipenyadi ari urup pun leka jaku tauka sakum patah sebut ti keterubah ari dijir siti rambai jaku, disebut tauka ditulis nyadi siti leka jaku ti entap, menyana sereta bisi mai reti. Jaku akronim tau ditulis ngena tiga chara.

      I.        Sakum urup keterubah ari rambai jaku ti dipandakka, lalu ditulis enggau urup besai enti iya jaku nama menyana.

Jaku Nama Menyana	Chunto
SIDS	Serakup Indu Dayak Sarawak
KGA	Komiti Gerija Anglika
YTJ	Yayasan Tun Jugah
SBISA	Searakup Bansa Iban Sri Aman

    II.        Sakum urup keterubah tauka patah sebut, ditulis enggau urup mit semua- mua enti jaku nama  menyana,

Ukai Jaku Nama Menyana	Chunto
palanem	palan latih nembiak
purata	pukul rata
pulapol	pusat latihan polis
pulako	pusat latihan kokurikulum
kugiran	kumpulan gitar rancak

   III.        Enti  jaku akronim nyadi ari sakum urup keterubah tauka patah sebut nya nyadi jaku nama menyana, jaku nya ditulis bepun enggau urup besai.

Jaku Nama Menyana	Chunto
Bernama	Berita Nasional Malaysia
Proton	Perusahaan Otomobil Nasional
Mara	Majlis Amanah Rakyat

Ari chunto ti udah dikerandauka, terang bendar chara nempa jaku akronim nya siti proses ngedut lalu besakumka leka jaku tauka patah sebut. Chara tu endang siti ari jalai kena nempa leka jaku ti bisi nyata peluang bekenjing mansang ba jaku Iban. Laban kitai sama ngasaika jaku Iban endang agi kurang leka jaku kena nangkup pemayuh displin ilmu lalu kena nyatup peminta ba jaku tu empu. Taja pia, jaku akronim suah ditempa kena nyebut muntang jaku nama menyana tang chara nempa iya nadai chara ti tetap, reti nya nitihka pengelentur sebut tauka pengentap jalai nulis sida ti ngepunka penemu nya. Nya alai, enti chara tu deka dikena ngemansangka jaku Iban dia mesti bisi atur ti meruan, tegap sereta tetap nyadi peduman.

2. 2 Leka jaku tumbuh

Baka ti udah disebut dulu ari tu, jaku tumbuh nya tukuh jaku ti diasilka ngena proses meri penambah ngagai urat jaku. Proses tu ngasilka tukuh jaku ti disebut jaku tumbuh. Penambah datai ari morfem berikat lalu urat jaku nya morfem meras ti ulih nerima penambah. Mimit bendar urat jaku ti dipeda nyadi morfem berikat ti disebut urat.

Penambah nya tukuh morfem ti enda ulih bediri kediri dalam ayat, reti nya iya mesti disakumka enggau urat jaku. Berindik ari endur iya ba urat jaku, penambah tau dibagi ngagai empat bengkah iya nya:

      i.        Penambah mua, ti datai ari mua urat jaku

     ii.        Penambah belakang, ti datai ari belakang urat jaku

    iii.        Penambah kepit, ti datai seretai lalu ngepit urat jaku

   iv.        Penambah selit, ti datai nyelit antara urat jaku

2. 2. 1 Jaku tumbuh penambah mua

Penambah mua tau datai dalam jaku nama tumbuh, jaku pengawa tumbuh enggau jaku adjektif tumbuh, baka tu:

Penambah mua jaku nama	Chunto
pe-	(penulis, penyapu, pemungkal)
pem-	(pemberita)
penge-	(pengebom, pengemudi, pengetin)
pel	(pelajar)
peng-	(pengajar, pengasu)
pe-	(pesakit, pekebun)
se-	(sependai, serumah)
per-	(peranak)
juru-	(juruselam, jurubahasa)
pra-	(prasekula, prasangka, prasejarah)
sub-	(subsistem, subkelas, substandard)
eka-	(ekajaku, ekachura, ekadimensyen)
dwi-	(dwijaku, dwifungsi, dwilambang)
supra-	(supranasional, suprakelas, suprasegmental)

Penambah mua jaku pengawa	Chunto
me-	(melandai, menanyi)
ng-	(ngibun, ngikat, ngarau)
ny-	(nyekal, nyilat, nyebut)
nge-	(ngechat, ngekar)
be-	(bebantai, bebini)
di-	(digetil, diambu, didinga)
dipe-	(dipejai, dipejurai, dipegendang)
en-	(entachang, entising)
em-	(empekak, empegal, empakap)
eng-	(engkebap, engkasak, engkabit)
te-	(tedani, tepantup, techengang)

Penambah mua jaku adjektif	Chunto
nge-	(ngeninggi, ngemesai)
ke-	(kekidu, kekesap)
me-	(memanah, memanis)
be-	(bebajik, bebesai, beburak)
pe-	(pepanjai, pepandak)
nge-	(ngemanah, ngemajik)
te	(tetegap, tetinggi)

2. 2. 2 Jaku tumbuh bepenambah belakang

Jaku tumbuh bepenambah belakang dalam jaku Iban semina bisi ba jaku pengawa tumbuh aja baka ba chunto di baruh tu.

Jaku tumbuh bepenambah belakang -ka	Chunto
	madah    -    (madahka) mejam     -    (mejamka) madam    -    (madamka) ngiling    -    (ngilingka) ngesai    -    (ngesaika) ngidup    -    (ngidupka) ngetan    -     (ngetanka)

2.2.3 Jaku tumbuh bekepit

Penambah kepit ba jaku tumbuh dalam jaku Iban datai dalam jaku pengawa. Chunto ia bakatu::

Jaku tumbuh bekepit	Chunto
me…ka	(melakangka, meridangka)
ng…ka	(ngemaruhka, ngemesaika)
ny…ka	(nyemakaka, nyelingkutka)
pe…ka	(pejeraka, pelapikka)
te…ka	(tegamaka, tejulukka)
be…ka	(bebaika, bedagangka)
di…ka	(digalika, dikemeranka)
dike…ka	(dikedekaka, dikemeranka)
te…ka	(tedingaka, tesipakka)
tepe…ka	(tepedayaka, teperindangka)

2. 2. 4 Jaku tumbuh selit

Jaku tumbuh ti betukuh selit tu balat mimit ditemu dalam jaku Iban. Tukuh jaku ti baka tu enda tentu produktif, lalu semina dikena ba lebas ti ditentuka aja. Jaku tumbuh selit semina bisi ba jaku nama enggau jaku adjektif aja. Chunto:

Penambah selit jaku nama	Chunto
-le-	kelemayang, kelebembang, kelekatai
-er-	serabut, berigi
penambah selit jaku adjektif	teberunsai, teberingkas, tebererak
-be-

2. 3 Leka jaku turu

Proses beturuka leka jaku nya proses bedijirka dua urat jaku tauka lebih lalu tukuh ke nyadi mai reti ti entap sereta meruan. Jaku turu disepil beserara lalu beserakup nyadi siti unit, iya nya tukuh ti enda ulih nerima sebarang leman bukai tauka leka jaku bukai ti diselit antara unit nya.

Dalam jaku Iban tukuh jaku turu ti bansa ti baka tu mayuh bendar nyementang ari jaku ti dikena besehari- sehari datai ngagai adat enggau leka main. Nitihka ripih, jaku turu tau dibagi ngagai :

Dalam kategori tu mega disengkaumka enggau tukuh jaku ti dikena meri tanda pangkat, gelar tauka ensumbar.

Jaku turu ti datai ari rambai jaku meras	Jaku turu ti betukuh terminologi	Jaku turu ti mai reti sempama	Jaku turu banding
kar perugan kereban tulis charta pai bom atom tanda pengingat	model linear reta pesaka keretas kereja segi tiga darah gatal	Jaku kelaung buah lemba anak ular betubuh bisi buah tamang raja	baka nya baka tu baka nyin baka ni
Tukuh jaku dikena meri tanda pangkat, gelar tauka ensumbar		Jaku turu silup nyual mata rangkai jaku bisi ati tajam runding
Kepala Menteri Raja Muda Kepala Pengajar Skretari Politik Tuai Rumah Bujang Berani		Jaku turu sema banding baka ukul labuh anak baka mayau enggau ukui munyi burung makai buah kara

2. 3. 1 Tukuh ti udah entap

Bisi sekeda tukuh jaku turu ti udah dikena enggau entap lalu nyadi leka jaku ti meruan sereta tegap, taja pan leka jaku nya endang nyata bendar datai ari dua urat jaku. Leka jaku ti baka nya endang tetap disepil nyadi seleka leka jaku. Nya alai, leka jaku kelimpah ari ti udah endang tetap disepil nyadi seleka leka jaku. Tukuh leka jaku ti baka nya tau dipeda di baruh tu.

            antarabansa                bumiputera

            matahari                      biaubalai

siti pekara ti patut diperatika ba alan tukuh jaku turu, iya nya jaku turu patut bendat ditulis beserara ngambika enda nyadika penyaru ba jalai nyepil. nya a;ai, jalai turu kelimpah ari ti endang udah entap tauka iya ti nyadi terminologi patut bendar ditulis beserara.

2. 3. 2 Betanduka jaku turu

betanduka jaku turu tau diaduka ngena chara betanduka ;eman keterubah aja. chunto :

Betanduka jaku turu

Kereban- kereban tulis balai- balai raya patah- patah sebut Menteri- Menteri Besai Kepala- Kepala Pengajar Sapit- Sapit Menteri Penulung – Penulung Kanan Mandal- Mandal Chanselor

2. 3. 3 Meri jaku penambah ngagai jaku turu

Jaku turu tau nerima penambah kena ngasilka jaku tumbuh. Penambah jaku turu tau nyadi ngena chara baka tu :

Jaku turu nerima penambah mua	Chunto
Lalu sepil leka jaku nya beserara	darah gatal      -     bedarah gatal nyual mata       -    bejual mata
Leka jaku keterubah ti udah nerima penambah diulang sebut. Tang diseraraka ngena tanda sekang ari leka jaku ti kedua.	tengah hari     -    setengah- tengah hari lemai kemari   -    selemai- lemai kemari
Lebuh leka jaku ti keterubah diulang sebut. Iya diseraraka ngena tanda sekang.	bisi ati            -     bisi- bisi ati rangkai jaku   -    rangkai- rangkai jaku
Lebuh jaku turu keterubah nerima penambah bekepit. sepil iya meruan beserara	nyual mata       -    bejualka mata mipis pending   -    ngemipiska pending

2. 4 Tukuh Jaku Betandu

Proses betanduka leka jaku dalam jaku Iban nya proses betanduka urat leka jaku. dalam proses tu, urat leka jaku tau betandu penuh, betandu setengah tauka betandu sebagi ba patah sebut dulu tauka dudi. enggau betandu urat leka jaku lalu sekeda besukung enggau penambah tauka nadai bepenambah. dalam jaku Iban bisi empat bengkah tukuh jaku  betandu, iya nya :

2. 4. 1 Jaku betandu patah sebut dulu

Jaku betandu patah sebut dulu nya tukuh ti batandu ba patah sebut dulu kelebih agi ba tukuh jaku adjektif. Chunto :

            besai- besai     -           bebesai

            dugau  - dugau            -           dedugau

            liga- liga                       -           leliga

2. 4. 2 Jaku betandu penuh

Jaku betandu penuh nya tukuh leka jaku ti dikena beulang- ulang. Sepil leka jaku ti dikena betandu enggau sebaka. Kelas jaku ti dikena betandu nya tau datai ari jaku pengawa, jaku nama rama, jaku adjektif tauka jaku tugas. Chunto :

            bagas              -           bagas - bagas

            degi- degi        -           degi - degi

            puas                -           puas- puas

            gama               -           gama- gama

2. 4. 3 Jaku betandu urat jaku

Jaku betandu urat jaku nya tukuh leka jaku ti ditandu ba urat leka jaku. Bisi dua pola jaku betandu urat leka jaku ba chunto dibaruh tu :

Pola jaku betandu urat jaku betukuh jaku pengawa	Pola jaku betandu urat jaku betukuh jaku adjektif
sipak    -    besipak- sipak	manah      -    manah- semanah
garu      -    begaru- garu	siru           -    siru- sesiru
jimat     -    bejimat- jimat	nelap        -    nelap- senelap
lubah    -    belubah- lubah	mar           -    mar- semar

2. 4. 4 Jaku betandu patah sebut dudi

Jaku betandu patah sebut dudi nya tukuh jaku ti betandu ba patah sebut dudi leka jaku tebal agi betukuh jaku adjektif.

Chunto :

                        berani              -           berani- rani

                        pengeran         -           pengeran- ngeran

                        pemerinsa       -           pemerinsa- rinsa

                        pemanah         -           pemanah- manah

                        belanda           -           belanda- landa

2. 4. 5 Tukuh jaku bekaling sebut

Jaku bekaling sebut nya tukuh jaku ti suah bendar dikena lebuh ngaga pemanah munyi jaku. Tukuh ti baka tu dikena kelebih agi dalam leka main. Enti diperatika enggau sekali ngilas iya endang bisi bekabih enggau jaku betandu. Tang lebas ti ngasuh iya besibil nya, iya ditulis beserara lalu nadai ngena tanda sekang. Nambahka nya iya mega ngemeranka pemanah munyi ti tau dikena ngangkatka empas kreatif dalam karang lalu nekanka ukur estetika. Bisi empat bengkah pola jaku bekaling sebut dibaruh tu.

2. 4. 5. 1 Pola vokal beulang- ulang nya pola ti nekanka enteli tauka munyi vokal ti besenutuk dikena ngemanah sereta nguatka reti leka jaku.

Urat Jaku	Kaling	Jalai Nulis Jaku Bekaling Sebut
1.    kusi 2.    buban 3.    butang 4.    gayu	ransi banan betumbang guru	kusi ransi buban banan butang betumbang gayu guru

2. 4. 5. 2 Pola jaku betimbal pola ti nekanka dua iti situasyen ti beserekangka tauka kaul ti betimbal reti dikena madahka pekara ti nyasi sama maya, leman pekara ti sama tingkat (degree) tauka kereban ti sama pemesai guna.

Urat Jaku	Kaling	Jalai Nulis Jaku Bekaling Sebut
1.    chelap 2.    kundang 3.    indu 4.    peputan	angat kasang lelaki tempan	chelap angat kundang kasang indu lelaki peputan tempan

2. 4. 5. 3 Pola kaul meras nya pola ti nujukka kaul ti tetap antara jaku ti endang udah tebalan lalu meruan dikena nyebut utai ti sama bansa tauka sebilik.

Urat Jaku	Kaling Sebut	Jalai Nulis Jaku Bekaling Sebut
1.    sirih 2.    tikai 3.    manuk 4.    penganan	pinang pua uduk penyaram	sirih pinang tikai pua manuk uduk penganan penyaram

2. 4. 5. 4 Pola rima ujung (enteli) nya pola ti nekanka munyi tauka rima ujung ti besenentang lalu suah agi dikena dalam enteli leka main.

Urat Jaku	Kaling	Jalai Nulis Jaku Bekaling Sebut
1.    semilu 2.    belulin 3.    perepat 4.    betuah	batu tinchin umat belimpah	semilu batu balulin tinchin perepat umat betuah belimpah

2. 4 6 Tukuh jaku puntang

Jaku puntang nya tukuh ti ngemuntangka sebut ba leka jaku. Tukuh jaku tu ditemu ba jaku ganti nama baka ba chunto di baruh tu.

Jaku Penuh	Jaku Puntang
enggi kita enggi kami enggi kita enggi aku enggi iya	engkita engkami engkita engku enggiya

3. 0 Kelas Leka Jaku

Leka jaku dalam siti - siti bansa jaku tau diripih ngagai raban jaku ti bebatang nitihka mayuh bengkah kriteria. Ambika chunto, kriteria struktur fonologi tauka munyi, kriteria struktur mirfem, kriteria struktur sintaksis, enggau kriteria semantik tau dikena beripihka leka jaku ngagai raban jaku.

Jaku nam, jaku pengawa, enggau jaku adjektif tau dikumbai raban batang jaku laban ditagaka nyadi teras ngagai batang frasa ayat, iya nya frasa nama, frasa pengawa, enggau frasa adjektif. Disimpulka, raban jaku dalam jaku Iban ulih dibagi ngagai empat iya nya jaku nama, jaku pengawa, jaku adjektif, enggau jaku tugas.

3. 1 Kelas Leka Jaku Nama

Kelas leka jaku nama nyengkaum sekeda leka jaku ti ulh nyadi leman teras ba pasuk frasa nama ti selalu dikena nyebut orang, tempat tauka nama utai. Raban jaku nama ulih mega dipechahka ngagai subraban tauka pechah raban nitihka chiri semantik. Reti chiri semantik jaku nama iya nya, reti ditanggam tiap- tiap leka jaku ti diripihka dalam raban jaku nama. Beduduk ari reti ti baka nya semua raban jaku nama tau dipechahka ngagai subraban, iya nya jaku nama menyana, jaku nama rama, enggau jaku ganti nama.

3. 1. 1 Jaku nama menyana

Jaku nama menyana nya jaku nama ti dikena nyebut nama menyana lalu sepil iya bepunka urup besai. Jaku nama menyana tau dibagi ngagai dua raban, jaku nama idup enggau jaku nama menyana ukai idup, bisi dua bagi, jaku nam idup mensia enggau jaku nama menyana idup ukai mensia.

Jaku nama menyana idup		Jaku nama menyana idup ukai mensia
Mensia	Ukai mensia
Esther Raja Azri Marie	Sengkalan (ukui) Biring Menaning ( manuk sabung) Vanda Diana (orkid)	Polis Diraja Malaysia Planet Pluto Bukit Sadok Proton Wira

3. 1. 2 Jaku nama rama

Jaku nama rama nya leka jaku ti dikena nyebut nama utai tauka pekara rama ti bisi ngembuan gaya tu betukuh rama. Jaku nama rama tau dibagi ngagai dua bengkah, iya nya jaku nama rama abstark enggau jaku nama konkrit. Jaku nama rama abstrak nya jaku nama ti mai konsep abstark tauka ukai betukuh nama utai. Lalu jaku nama konkrit nya jaku nama ti mai konsep nama utai ti nyata.

Jaku nama rama abstrak	Jaku nama rama konkrit
roh semengat meredeka benda tunggu demokrasi	lempuang rumah pengajar jelatung ambai

3. 1. 3 Jaku ganti nama

Jaku ganti nama tau dibagi ngagai dua subraban mit, iya nya jaku ganti nama tunjuk enggau jaku ganti nama orang. Jaku ganti nama orang tau dipechahka ngagai jaku ganti nama diri orang. Jaku ganti nama diri orang kedua, jaku ganti nama diri orang ketiga enggau jaku ganti nama diri orang beempu.

Jaku ganti nama tunjuk	Jaku ganti nama diri
	Jaku ganti nama diri tanya	Jaku ganti nama diri orang
Tu kena nunjuk ngagai orang ti datai tegu tauka pekara ti benung disebut	Sapa ti dikena nanyaka bagi orang	Jaku ganti nama diri orang kesatu dikena nganti nama orang ti bejaku. aku, kami, kitai
Nya kena nunjuka ngagai utai ti semak tang enda ulih ditegu tauka pekara ti bisi kaul enggau pekara ti benung disebut	Nama ti dikena nanyaka nama utai tauka nama utai pekara	Jaku ganti nama diri orang kedua dikena nganti nama orang enggau berandau. nuan, seduai, kita
Nyin kena nunjuk ngagai utai ti jauh tauka pekara ti nyata bendar beseraka	Ni dikena nanyaka bagi orang tauka bansa utai	Jaku ganti nama diri orang ketiga dikena nganti nama orang ti dikenang tauka disebut lebuh dua iku orang berandau.
		Jaku ganti nama diri orang ti beempu dikena nganti nama orang ti empu utai. engkitai, kendua, kenduai, enggiya

3. 2 Kelas leka jaku pengawa

Kelas jaku pengawa nyengkaum sekeda urat jaku ti tau nyadi leman teras dalam pasuk frasa pengawa. Kelas jaku pengawa tau dibagi ngagai dua raban, iya nya jaku pengawa transitif enggau jaku pengawa ukai transitif. Jaku pengawa ukai transitif nya tau dibagi ngagai jaku pengawa transitif aktif enggau jaku pengawa transitif pasif.

3. 2. 1 Jaku pengawa ukai transitif

Jaku pengawa ukai transitif nya jaku pengawa ti nadai begunaka penyambut tauka objek entudika iya. Taja pan, bisi sekeda jaku pengawa ukai transitif mesti dientudika penembu , tang sekeda agi enda begunaka penembu. Ari nya, jaku pengawa ukai transitif tau dibagi ngagai dua subraban, iya nya jaku pengawa ukai transitif bepenembu enggau jaku pengawa ukai transitif nadai bepenembu.

Jaku pengawa ukai transitif nadai bepenembu	Jaku pengawa ukai transitif bepenembu
dani tumbang pulai nyabak	belinsur gerai meruan sayau beratapka biru besenyataka ilang

3. 2. 2 Jaku pengawa transitif

Jaku pengawa transitif nya jaku pengawa ti nerima penyambut entudika iya, ti disebut objek. Jaku pengawa transitif mega tau dibagi ngagai dua raban, iya nya jaku pengawa transitif aktif enggau jaku pengawa transitif pasif. Jaku pengawa transitif aktif nya jaku pengawa ti nerima penambah mua baka tu;; ng-, be-, m-, ny-, n-, enggau -ka. Jaku pengawa transitif pasif nya jaku pengawa asil ari proses transformasyen tauka ubah ayat aktif nyadi ayat pasif.

Jaku pengawa (transitif aktif)	Jaku pengawa (transitif pasif)
ngemas berandauka meli nyait numpu tetimbak	dikemas dikerandauka dibeli dijait ditumpu ditimbak

3. 3 Kelas leka jaku adjektif

Jaku adjektif nya mungkur sekeda jaku ti tau nyadi leman teras dalam pasuk frasa adjektif. Kelas leka jaku adjektif nadai subraban ti nyengala. Taja pia, jaku adjektif tau dibagi ngagai pengabis kurang semilan raban nithka reti leka jaku ti disebut jaku adjektif.

Jaku adjektif gaya	manah, jai, regas, pandai, lembuit, kasar
Jaku adjektif chura	burak, chelum, mirah, banda, gadung
Jaku adjektif sukat/ takar	panjai, pandak, renjan, landai, tebal,
Jaku adjektif tukuh	segala, benjung, chapir, gendung
Jaku adjektif rawang	nyamai, bajik, rengut, alus, taing- taing
Jaku adjektif maya	tekalanya, lubah laun, jampat tumu
Jaku adjektif chara	jampat laju, deras, laun, begadai, betagai
Jaku adjektif geragayak ati	beraie, benchi, lelengau, sayau, rindu
Jaku adjektif seraka	jauh, semak, ampir, besendi, ngejang

3. 4 Kelas jaku tugas

Raban jaku tugas nya raban jaku ti betukuh mayuh bengkah tauka disebut heretirogen, ngembuan tukuh ti sama. Iya enda ulih bediri nyadi leman teras ngagai frasa endosentrik: frasa nama, frasa pengawa enggau frasa adjektif. Semua leka jaku dalam raban jaku tugas semina masuk ke dalam pasuk ayat bepanggai ba kaul iya enggau jaku pengawa, jaku nama, enggau jaku adjektif lalu nambahka nya iya mega bepanggai ba kaul sechara terus enggau pasuk frasa tauka klausa.

Frasa Adjektif
Jaku penguat	Jaku adjektif
amat chukup sigi kurang	manah peniggi mentas manis

Jaku tugas masuk ke dalam ayat, klausa, tauka frasa kena nanggam lalu ngenegapka sesebengkah tugas sintaksis ti nyata, sekalika nyadi penyambung, penerang, penguat, enggau mayuh tugas bukai.

Jaku penyambung	tauka,  enggau,  lalu
Jaku tekenyit	apu, akai, bah
Jaku tanya	baka ni, kemaya, berapa
Jaku perintah	arap, minta, lalu
Jaku pun ayat	nya alai, taja pan, enggau tu
Jaku bantu	udah, deka , kala
Jaku penguat	amat, pemadu, kurang
Jaku penentu	mih, pia, dih
Jaku sangkal	ukai, nadai, enda
Jaku penunjuk	nya, iya nya
Jaku penempat	di, ke, ari, dalam
Jaku pemendar	ya, brtul, amat, bendar
Jaku penyampau	tiga, semua, beribu- ribu
Jaku adap	atas, baruh, dalam