Definisyen Fonetik Enggau Fonologi Jaku Iban

1.0 Definisyen Fonetik enggau Fonlogi

Leka jaku fonetik enggau fonologi nya dua pekara ti nya deka sebaka ari segi reti tang endang terang bisi bebida tauka penyelai mimit entara pangan diri. Semina udah kitai teleba enggau sesebengkah bansa jaku, nya baru kitai nemu pekara ke besempikut enggau tiap- tiap munyi ke diasilka endang bisi reti ti deka dikenataika lalu munyi nya ditusun nitihka atur ke ditetapka.

Pansik munyi jaku ti diasilka munyi organ artikulasyen nya dikumbai fonetik. Reti nya fonetik mansik produksyen enggau persepsyen munyi jaku. tubuh mensia disikap enggau organ ti tau ngeluarka munyi jaku ngena mekanisme dalam tiga bengkah rumbang. Nyadi rumbang ke disebut nya rumbang mulut, rumbang idung enggau rumbang farinks. Fonetik ulih dibagi ngagai tiga bansa, iya nya fonetik artikulasyen, fonetik akuistik enggau fonetik auditori. Nya alai fonetik begunaka pengawa mansik tiap- tiap leman munyi, lalu ngasilka transkripsyen unkup tiap - tiap munyi ari semua jaku.

Tang fonologi nya siti bidang ti mansik sistem sekeda munyi dalam sesebengkah jaku mensia. Bidang fonologi nyimpul, betungkapka lalu bebidaka tukuh munyi jaku nya. Nya alai fonologi nerangka pasal sekayu munyi ti diasilka mensia, betungkap lalu nyerita pasal sistem munyi semua jaku ti dipansutka, sekalika disebut mensia enggau betul tauka enda. Fonologi mansik sistem munyi sesebengkah jaku mensia sereta negika tukuh asal sistem munyi jaku nya. Bidang tu mega betungkapka kaul entara beberapa leksikal ti nirika ayat. Fonologi megai siti da agi tanggung pengawa iya nya mansik pola entak sebut tauka intonasyen. Ari leksikal enggau pola entak sebut tu mih ke ulih ngasilka sistem sepil sesengkah bansa.

David Abercrombie (1971) dalam bup iya Elements of General Phonetics madahka fonologi tu sesebengkah bidang linguistik ti ngembuan tukuh teknikal. Ari segi penemu, sesebengkah jaku dipeda sechara analitis, iya nya bejaku ukai semina ngemeranka pengawa mending tang begunaka kitai beratika seranyat kinsit organ dalam tubuh mensia. Lebuh maya bejaku, angin pansut ari rumbang nyawa ti ngasilka munyi, retinya angin bisi keluar masuk ari lempuang lebuh kitai enseput enggau bejaku.

Lalu bidang fonetik artikulasyen tu mansik chara sesebengkah munyi diasilka rengka artikulatori ba tubuh kitai mensia. Nya alai mayuh bengkah rengka artikulatori kitai mensia diguna lebuh munyi jaku pansut ari rumbang nyawa. Endur munyi jaku nya diasilka disebut palan artikulasyen tauka organ artikulasyen ti befungsi ngeluarka munyi jaku. bisi munyi jaku nya nyaris, mantik begetar lalu bisi nya semina munyi ke semina meresih aja. Besenutuk enggau nya, kitai patut belematika tiap- tiap bengkah munyi tu bisi reti magang- magang lalu ngundan mesej ngagai bala peninga.

Kelimpah ari nya, fonetik akuistik tu sebengkah bidang penemu ti mansik munyi jaku kitai. Enti fonetik artikulasyen bekenangka pasal palan alai ngasilka munyi dia fonetik akuistik mansik gelumbang angin ti mai munyi nya ngagai pending mensia. Retinya, fonetik akuistik mansik klasifikasyen munyi ti pansut ari mulut kitai, ari segi fitur fizikal ambika chunto empas munyi, pengelantang munyi enggau pemanjai munyi sebut.

Kepenudi bendar iya nya fonetik auditori tu bekaul enggau pekara mending enggau proses ti nyadi lebuh kitai nerima munyi lalu baka ni munyi tu diasaika tauka didinga kitai. Nya alai, hal ti bakatu besangkut paut enggau perengka tubuh ti bukai baka untak enggau pending. Chunto iya, munyi dibai angin lalu kitai ngasaika tauka nerima stimulus nya ngena pending. Ngenang pasal proses nerima munyi tu, kitai betarakka beberapa bengkah pekara ti bekaul enggau munyi, iya nya gelumbang tauka alun munyi, runding pending, bagi tangah pending jenila pending, getar munyi, penerang ti didinga, untak enggau peninga empu.